امریکا کا پاکستان کے ساتھ معاشی سرگرمیاں بڑھانے کا عندیہ

واشنگٹن(ہم صفیر نیوز) وائٹ ہاؤس کی جاری کردہ فیکٹ شیٹ میں کہا گیا ہے کہ امریکا اور پاکستان میں اسٹریٹجک تعلقات بہتر ہونے سے دو طرفہ تجارتی تعلقات مزید بڑھ سکتے ہیں۔غیرملکی خبررساں ادارے کے مطابق”امن و استحکام کے لیے کام، معاشی خوشحالی قائم کرنا“ کے نام سے جاری فیکٹ شیٹ میں کہا گیا کہ امریکا اور پاکستان مظبوط معاشی شراکت دار ہیں جس سے دونوں ملکوں کو فائدہ پہنچتا ہے۔سرکاری دستاویزات میں بتایا گیا کہ پاکستان اور امریکا نے گزشتہ سال 6.6 ارب ڈالر کے اشیا کی تجارت کی جو باہمی تجارت کا نیا ریکارڈ ہے۔دستاویزات میں پاکستان کا افغان امن مرحلے میں کردار کی نشاندہی کی تھی، امریکی حکام نے اسلام آباد سے بھارت اور افغانستان کے درمیان ٹرانزٹ تجارت کے لیے بھی زور دیا اور کہا کہ جنوبی اور وسطی ایشیائی خطے میں تجارت میں اضافے سے تمام کو فائدہ پہنچے گا۔22 جولائی کی نیوز بریفنگ میں پاکستانی کی معاشی ترقی کے لیے ان کی انتظامیہ کے کردار کے سوال کے جواب میں امریکی صدر ڈونلڈ ٹرمپ نے پاکستان سے تجارت میں اضافے کی خواہش کا اظہار کیا۔ان کا کہنا تھا کہ ہاں مجھے پاکستان سے مزید تجارت نظر آتی ہے، اور میں تھوڑی بہت زیادہ کی بات نہیں کر رہا ہوں، ہم 10 سے 20 فیصد اضافہ کرسکتے ہیں۔انہوں نے کہا کہ پاکستان عظیم ملک ہے، یہ بہت بڑا ملک ہے اور ان کی بہترین مصنوعات ہیں، وہ بہت اچھی اشیا بناتے ہیں۔ڈونلڈ ٹرمپ کا کہنا تھا کہ جب میں نجی شعبے میں تھا تو میں نے پاکستان سے خریداری کی ہیں، وہ بہت بہترین چیزیں بناتے ہیں، وہ بہت ذہین اور محنت کش ہیں۔ان کا کہنا تھا کہ مجھے یقیب ہے کہ امریکا اور پاکستان کے درمیان بہترین تجارتی تعلقات قائم ہوسکتے ہیں۔انہوں نے کہا کہ پاکستان سے تجارت بڑھانے پر مجھے یقین ہے کیونکہ مجھے لگتا ہے کہ ہم جو کر رہے ہیں وہ ابھی زیادہ نہیں، ہمیں مزید کام کرنا ہوگا۔ڈونلڈ ٹرمپ کا بیان اور وائٹ ہاؤس کی فیکٹ شیٹ عمران خان کے دورہ امریکا کی کامیابی کے حوالے سے اسلام آباد کے دعوے کی تصدیق کرتا ہے تاہم اس میں چند اہم مسائل کا بھی ذکر کیا گیا جنہیں تعلقات میں مزید بہتری کے لیے حل کیا جانا ہے۔دستاویزات میں بتایا گیا کہ پاکستان نے اس ہی عرصے کے دوران بڑی تعداد میں امریکی لیکوئیفائڈ نیچرل گیس کی خریداری کی ہے۔ایگزون موبل نے 27 سال بعد پاکستانی مارکیٹ میں 2018 میں دوبارہ اپنی جگہ بنائی تھی۔

Facebook Comments

POST A COMMENT.